Áfram dynja áföllinn á handknattleiksliði ÍBV. Elís Þór Aðalsteinsson, örvhenta skyttan efnilega ristarbrotnaði á æfingu 20 ára landsliðsins í gær og verður frá keppni í allt að 10 vikur. Þetta staðfesti Erlingur Richardsson þjálfari ÍBV við handbolta.is í kvöld.
Þar með er ekki öll sagan sögð því grunur leikur á að vinstri hornamaður ÍBV-liðsins, Jakob Ingi Stefánsson, hafi slitið krossband á æfingu ÍBV-liðsins í fyrrakvöld. Hann fer í ítarlegri skoðun á næstu dögum til þess að fá stöðuna á hreint.
Báðir meiddust á æfingu
Elís Þór hefur farið á kostum með ÍBV í vetur og er næst markahæsti leikmaður Olísdeildar karla eftir átta umferðir með 75 mörk. M.a. skoraði hann 15 mörk á dögunum í leik gegn Aftureldingu og 11 gegn KA á síðasta laugardaginn.
Elís Þór var að æfa með 20 ára landsliðinu þegar hann meiddist í gær en 20 ára landsliðið leikur þessa dagana við A-landslið Grænlands tvisvar sinnum hér heima.
Jakob Ingi meiddist á æfingu ÍBV í fyrrakvöld.
Fleiri eru úr leik hjá ÍBV
Meiðsli Jakobs Inga og Elíss Þórs bætast ofan á fjarveru Petar Jokanovic markvarðar sem er frá keppni vegna tognunar í aftanverður læri. Einnig er Daníel Þór Ingason úr leik eftir að hafa meiðst illa á öxl þegar unnið var að upptökum á kynningarefni fyrir HSÍ fyrr í þessum mánuði. Vonir standa til að það styttist í endurkomu Daníels Þórs.
Einn í banni
Ofan í kaupið þá verður Kristófer Ísak Bárðarson í leikbanni í næsta leik ÍBV þegar Eyjamenn sækja ÍR-inga heim í 9. umferð Olísdeildar karla að viku liðinni.
