Elliði Snær Viðarsson var markahæstur hjá Gummersbach ásamt Frakkanum Kentin Mahé þegar liðið vann Svíþjóðarmeistara IK Sävehof, 37:35, á heimavelli í fyrstu umferð H-riðils Evrópudeildarinnar í handknattleik. Liðin tvö eru er með FH og Fenix Toulouse í riðli í keppninni. Gummersbach mætir til leiks gegn FH í Kaplakrika eftir viku.
Elliði Snær skoraði sjö mörk og var einu sinni vikið af leikvelli enda fastur fyrir í vörninni að vanda. Milos Vujovic skoraði sex mörk og næstur á eftir Mahé og Elliða Snæ.
Teitur Örn Einarsson lék ekki með Gummersbach vegna meiðsla en hann hefur verið frá keppni sökum þeirra um nokkurt skeið.
Tryggvi skoraði
Tryggvi Þórisson skoraði eitt mark fyrir IK Sävehof. Emil Berlin og Pontus Brolin voru markahæstir með sex mörk hvor. Selfyssingnum var einu sinni vísað af leikvelli í tvær mínútur.
Stiven og félagar unnu í Sviss
Stiven Tobar Valencia skoraði eitt mark í góðri ferð Benfica til Schaffhausen í Sviss hvar liðið lagði svissnesku meistarana, Kadetten, 26:25, í hnífjöfnum leik. Óðinn Þór Ríkharðsson var markahæstur hjá Kadetten með sex mörk. Luka Maros og Parik Martinovoc skoruðu fjögur mörk hvort.
Leika í C-riðli
Bélone Ferreira de Almeida Moreira var markahæstur hjá Benfica með átta mörk. Portúgalska liðið var þremur mörkum yfir í hálfleik, 15:12.
Kadetten og Benfica eru í C-riðli eins og Presov frá Slóvakíu og Limoges frá Frakklandi.
Fleiri íslenskir handknattleiksmenn verða á sveimi með liðum í keppninni síðar í kvöld.
Evrópudeild karla “24 – riðlakeppni 32-liða – 1. umferð, úrslit
Elvar og Arnar unnu í Porto – Þorsteinn með 4 og Guðmundur Bragi 3
