Landsliðsmanninum Elliða Snæ Viðarssyni líkar svo sannarlega lífið hjá Vfl Gummersbach í Þýskalandi. Í dag var tilkynnt að Eyjamaðurinn hafi bætt tveimur árum við fyrri samning sinn við félagið. Fyrri samningur var til ársins 2027 en með viðbótinni er Elliði Snær samningsbundinn Gummersbach til loka júní árið 2029.
Elliði Snær gekk til liðs við Gummersbach frá ÍBV í ágúst 2020, rétt eftir að Guðjón Valur Sigurðsson tók við þjálfun liðsins í kjölfar þess að hann lagði keppnisskóna á hilluna.
Gummersbach var þá í næstefstu deild. Vorið 2022 vann Gummersbach sér sæti í efstu deild á nýjan leik eftir nokkurra ára veru í 2. deild. Elliði Snær hefur frá fyrsta degi verið í hópi öflugustu og tryggustu leikmanna liðsins sem hefur skipað sér í hóp fremstu liða Þýskalands á nýjan leik.
Elliði Snær, sem varð 27 ára gamall, í síðasta mánuði hefur leikið 62 landsleiki og m.a. tekið þátt í síðustu fimm stórmótum landsliðsins.
