Elmar Erlingsson átti stórleik með ÍBV í dag þegar liðið vann HB Red Boys Differdange öðru sinni á tveimur dögum í Lúxemborg í annarri umferð Evrópubikarkeppninnar í handknattleik karla, 35:34. Samanlagt vann ÍBV með fimm marka mun, 69:64, og verður með í pottunum þegar dregið verður í 32-liða úrslit eftir rúma viku.
Elmar skoraði 10 mörk í 11 skotum. Fengu leikmenn HB Red Boys Differdange ekkert við piltinn ráðið í þessum ham. Fleiri leikmenn ÍBV lögðu svo sannarlega sín lóð á vogarskálarnar að þessu sinni.
Frábær leikur Eyjamanna í fyrri hálfleik lagði grunn að sigrinum en að þegar hann var að baki var forskotið sjö mörk, 21:14, en ekki hafði steinn staðið yfir steini í varnarleik HB Red Boys Differdange.
Mörk ÍBV: Elmar Erlingsson 10, Arnór Viðarsson 5, Gauti Gunnarsson 4, Daniel Vieira 4, Breki Þór Óðinsson 3, Sigtryggur Daði Rúnarsson 3, Sveinn Jose Rivera 2, Friðrik Hólm Jónsson 2, Gabríel Martinez Róbertsson 1, Kári Kristján Kristjánsson 1.
Varin skot: Petar Jokanovic 7, 20% – Pavel Miskevich 1, 14,2%.
