Elmar og félagar flugu áfram í aðra umferð

Elmar Erlingsson og samherjar í Nordhorn-Lingen flugu áfram í aðra umferð þýsku bikarkeppninnar í kvöld með öruggum sigri á Eintracht Hildesheim í Volksbank-Arena í Hildesheim, 35:27, eftir að hafa verið sjö mörk yfir í hálfleik. Þetta var síðasti leikurinn í fyrstu umferð bikarkeppninnar.

Elmar virtist aðallega koma við sögu í fyrri hálfleik í leik. Hann skoraði tvö mörk í fjórum skotum og gaf eina stoðsendingu.

Yfirburður Nordhorn-Lingen voru miklir. Liðið var hvað eftir annað með 12 marka forskot um og upp úr miðjum síðari hálfleik áður en slakað var aðeins á klónni síðustu mínúturnar.