Elvar Ásgeirsson hefur skrifað undir nýjan þriggja ára samning við danska úrvalsdeildarliðið Ribe-Esbjerg. Nýi samningurinn tekur við af fyrri samningi Elvars við félagið sem átti að gilda til loka næsta tímabils.
Elvar, sem lék með Aftureldingu upp yngri flokka og í meistaraflokki kom til Ribe-Esbjerg sumarið 2022 eftir að hafa leikið með Nancy í Frakklandi í hálft annað ár og í annan eins tíma áður með Stuttgart í Þýskalandi. Elvar hefur fallið vel inn í lið Ribe-Esbjerg og er einn af burðarásum, jafnt í vörn sem sókn.
Elvar á að baki 21 A-landsleik og var síðast með gegn Eistlendingum í umspilsleikjum fyrir HM fyrir ári.
Á yfirstandandi leiktíð hefur Elvar skorað 58 mörk í 27 leikjum og gefið 64 stoðsendingar auk þess að vera sjö sinnum vikið af leikvelli í tvær mínútur.
