Embla til Stjörnunnar – sú sjötta sem kveður HK

Handknattleikskonan Embla Steindórsdóttir hefur gengið til liðs við Stjörnuna og þar með ákveðið að kveðja uppeldisfélag sitt HK. Stjarnan, handknattleiksdeild, segir frá vistaskiptunum í dag.

Embla hefur á síðustu tveimur árum leikið sífellt stærra hlutverki hjá HK. Einnig hefur hún leikið með U17 og U18 ára landsliðum kvenna og er um þessar mundir að búa sig undir þátttöku með U19 ára landsliðinu á Evrópumótinu sem hefst i Rúmeníu 6. júlí.

Embla getur leikið í báðum skyttustöðunum og einnig tekið að sér hlutverk leikstjórnanda. Til viðbótar er Embla skotviss vítaskytta og sterkur varnarmaður.

Embla er a.m.k. sjötti leikmaður kvennaliðs HK á síðustu leiktíð sem kosið hefur á síðustu vikum að leita nýrra áskorana.