Bjarni Ófeigur Valdimarsson og félagar IFK Skövde er komið með bakið upp að vegg í einvígi við Ystads IF HF í átta liða úrslitum um sænska meistaratitilinn eftir annað tapið í röð í dag, 28:26. Leikurinn fór fram í Skövde. Sænsku meistararnir hafa þar með tvo vinninga gegn engum hjá Skövde. Þriðja viðureign liðanna fer fram í Ystad á þriðjudagskvöldið. Takist Ystads-liðinu að vinna leikinn tryggir það sér sæti undanúrslitum.
Bjarni Ófeigur skoraði þrjú mörk í leiknum í dag og átti tvær stoðsendingar. Skövde-liðið náði sér ekki á strik í fyrri hálfleik og skoraði aðeins níu mörk gegn 12 mörkum gestanna. Hinn lipri Julius Lindskog Andersson skoraði 10 mörk fyrir Ystads.
Tap hjá Ásgeiri Snæ
Í umspili um sæti í sænsku úrvalsdeildinni á næsta tímabili jafnaði lið Karlskrona metin í rimmu sinni við Helsingborg með öruggum sigri í Helsingborg í dag, 27:25. Heimaliðið skoraði síðustu fjögur mörkin.
Ásgeir Snær Vignisson skoraði eitt mark fyrir Helsingborg. Þriðja viðureign liðanna verður á miðvikudagskvöldið.
Karlskrona hafnaði í öðru sæti næst efstu deildar. Ólafur Andrés Guðmundsson samdi á dögunum við félagið og mun leika með liði þess næstu árin ef að líkum lætur.
