„Mér líður rosalega vel, get varla beðið eftir því að byrja. Líðanin er þannig núna,“ sagði leikstjórnandi landsliðsins Sandra Erlingsdóttir í samtali við handbolta.is í morgun áður en íslenska landsliðið hélt til sinnar síðustu æfingar áður en keppni hefst á heimsmeistaramótinu á morgun með leik við Slóvena klukkan 17 í DNB-Arena í Stafangri.
Sandra segir engan vafa leika á að vináttuleikirnir þrír á Posten Cup mótinu í Lillehammer og í Hamar hafi fært íslenska liðið skrefinu framar, búið það undir þau skref sem framundan eru á stóra sviði heimsmeistaramótsins. „Liðið er á mjög góðum stað um þessar mundir.“
Góðar sextíu mínútur geta fleytt okkur lengra
Getur ekki verið betra
„Við erum allar frekar góðar eftir meira en viku samveru,“ svaraði Sandra létt í bragði spurð hvort leikmenn væri ekkert orðnir leiðir á samverunni. „Ég er með Andreu [Jacobsen] í herbergi. Samkomulagið hjá okkur gæti ekki verið betra en það er. Við náum mjög vel saman.
Vissulega er það áskorun fyrir okkur vera lengi saman og um leið lærdómsríkt fyrir okkur enda stefnum við á að taka þátt í fleiri stórmótum á næstu árum,“ sagði Sandra.
Hverjar eru konurnar 18 í fyrsta HM-hópnum í 12 ár?
Förum í alla leiki til að vinna
Spurð út í fyrsta leik íslenska landsliðsins á morgun gegn Slóvenum sagði Sandra það fyrst og fremst vera spennandi en um leið krefjandi.
„Við förum í alla leiki til þess að vinna. Hver niðurstaðan verður liggur fyrir í leikslok eins og gefur að skilja. Fyrstu leikirnir verða erfiðir, það er okkur ljóst. Við vitum að þetta verður krefjandi og teljum okkur geta mætt því hver sem úrslitin verða.“
Mér líður rosalega vel, get varla beðið eftir því að byrja
Ekki fjarlægur draumur
Með hvaða markmið ferð þú inn heimsmeistaramótið?
„Mótið verður langt og erfitt en við þurfum einn sigur í þremur fyrstu leikjunum til þess að komast í milliriðil. Ég sé að það er alveg gerlegt með góðri spilamennsku með fáum tæknifeilum. Góðar sextíu mínútur geta fleytt okkur lengra,“ sagði Sandra Erlingsdóttir sem leikur á morgun sinn 26. A-landsleik.
Leikir Íslands á HM: 30. nóvember: Slóvenía - Ísland, kl. 17. 2. desember: Ísland - Frakkland, kl. 17. 4. desember: Angóla - Ísland, kl. 17. - Leikið verður í Stavanger Idrettshall (DNB-Arena) sem rúmar 4.100 áhorfendur í sæti.
