„Þetta var hörkuleikur í um 50 mínútur áður við stungum af og náðum níu marka forskoti. Varnarleikurinn var mjög góður allan leikinn og markvarslan fylgdi með,“ sagði Sigrún Ása Ásgrímsdóttir leikmaður ÍR við handbolta.is eftir sigur ÍR-inga á Aftureldingu, 24:20, í Olísdeild kvenna að Varmá í dag. Þetta var annar sigur ÍR á Aftureldingu í deildinni á leiktíðinni og um leið fyrsti sigur ÍR á útivelli.
Skiptir öllu máli
„Ég hefði viljað halda í forskotið sem við vorum komnar með skömmu fyrir leikslok en sigur er sigur. Hann skiptir öllu máli,“ sagði Sigrún Ása ennfremur og bætti við að ÍR-ingar hefðu stillt leiknum upp sem úrslitaleik, einum af hinum svokölluðu fjögurra stiga leikjum.
Komnar lengra
„Þessi sigur skipti okkur miklu máli, stigin eru mjög mikilvæg í baráttu okkar í deildinni. Það var mikil stemning í félaginu fyrir leiknum í dag. Við sýndum það í dag að við erum komnar lengra en margir halda. Við settum okkur háleit markmið fyrir tímabilið og erum langt komnar með að ná þeim,“ sagði Sigrún Ása Ásgrímsdóttir skiljanlega hress og kát eftir sigurinn góða að Varmá.
Staðan og næstu leikir í Olísdeild kvenna.
