Öðru sinni á leiktíðinni vann ÍR nýliðaslag Olísdeildar kvenna gegn Aftureldingu er liðin mættust að Varmá í dag, 24:20. Þetta var fyrsti sigur ÍR á útivelli í Olísdeldinni í vetur. Þar með hafa ÍR-ingar unnið sér inn átta stig í deildinni og sitja tryggilega í fimmta sætinu þegar átta leikjum er lokið. Afturelding er hinsvegar áfram í nokkru basli í neðsta sæti með tvö stig.
Barátta og spenna einkenndi leikinn að Varmá í dag enda talsvert undir, ekki síst fyrir Aftureldingu sem sárlega vantaði og vantar enn stigi. Hvorugt liðið lék vel og talsvert var um einföld mistök á báða bóga. ÍR-ingum gekk betur að nýta sér mistök Aftureldingar en hitt.
Markverðir beggja liða, Ísabella Schöbel Björnsdóttir, ÍR, og Saga Sif Gísladóttir hjá Aftureldingu, voru bestu leikmenn liðanna í fyrri hálfleik. ÍR hafði frumkvæðið og náði mest þriggja marka forskoti, 10:7, skömmu áður en fyrri hálfleikur var úti. Mosfellingar skoruðu tvö síðustu mörk. ÍR var marki yfir í hálfleik, 10:9.
Lengst af síðari hálfleiks var munurinn ekki nema eitt og tvö mörk ÍR í vil. Þegar á leið tókst ÍR-ingum að vinna boltann nokkrum sinnum af Aftureldingarliðinu og skorað auðveld mörk. Sex mínútna kafli reyndist Aftureldingarliðinu erfiður. Þá skoraði ÍR sjö mörk í röð og breytti stöðunni úr15:18 í 15:24 þegar fimm mínútur voru til leiksloka.
Sóknarleikurinn varð Aftureldingu að falli. Hann var hægur og mistækur og skoraði liðið ekki nema 15 mörk á 50 mínútum. Slíkt er ekki vænlegt til árangurs.
Staðan og næstu leikir í Olísdeildum.
Erum komnar lengra en margir halda
Mörk Aftureldingar: Susan Ines Gamboa 5/1, Hildur Lilja Jónsdóttir 4, Ragnhildur Hjartardóttir 3, Katrín Helga Davíðsdóttir 3, Brynja Fossberg Ragnarsdóttir 2, Lovísa Líf Helenudóttir 1, Hrafnhildur Hólm Guðnadóttir 1, Telma Rut Frímannsdóttir 1.
Varin skot: Saga Sif Gísladóttir 13, 37,1%.
Mörk ÍR: Karen Tinna Demian 8/4, Anna María Aðalsteinsdóttir 5, Sara Dögg Hjaltadóttir 3, Hanna Karen Ólafsdóttir 3, Sigrún Ása Ásgrímsdóttir 2, Ásthildur Bertha Bjarkadóttir 1, Matthildur Lilja Jónsdóttir 1, Sylvía Sigríður Jónsdóttir 1.
Varin skot: Ísabella Schöbel Björnsdóttir 8, 30,8% – Hildur Öder Einarsdóttir 2/2, 100%.
Handbolti.is var að Varmá og fylgdist með leiknum í textalýsingu.
