ÍBV er úr leik í Evrópubikarkeppni karla í handknattleik eftir að hafa gert jafntefli við austurríska liðið Förthof UHK Krems, 32:32, síðari viðureign liðanna í 32-liða úrslitum í Vestmannaeyjum í dag. Förthof UHK Krems vann fyrri viðureignina í Austurríki fyrir viku með tveggja marka mun og heldur þar með áfram keppni í 16-liða úrslitum keppninnar.
Eyjamenn náðu sér ekki á strik í fyrri hálfleik í dag. Þeir voru sex mörkum undir að loknum fyrri hálfleik, 19:13. Eftir að hafa farið yfir sín mál í hálfleik byrjaði ÍBV-liðið af krafti í þeim síðari og skoraði níu fyrstu mörk síðari hálfleiks og komst yfir, 22:19. Austurríska liðið jafnaði metin og komst yfir, 28:26. ÍBV jafnaði og síðustu mínúturnar voru jafnar og spennandi.
Mörk ÍBV: Daniel Viera 7, Sigtryggur Daði Rúnarsson 7, Arnór Viðarsson 5, Dagur Arnarsson 4, Gabríel Martinez Róbertsson 3, Gauti Gunnarsson 1, Andrés Marel Sigurðsson 1, Kári Kristján Kristjánsson 1.
Varin skot: Pavel Miskevich 6, 24% – Petar Jokanovic 5, 29,4%.
