Elvar Örn Jónsson og félagar í Skjern fengu slæma útreið á heimavelli í kvöld þegar leikmenn Bjerringbro/Silkeborg komu í heimsókn í síðasta leik 24. umferðar dönsku úrvalsdeildarinnar í handknattleik. Leikmenn Skjern áttu á brattann að sækja í fyrri hálfleik en í þeim síðari yfirspiluðu leikmenn gestirnir liðsmenn Skjern og unnu með 11 marka mun, 35:24.
Skjern er í sjöunda sæti þegar tvær umferðir eru eftir og er öruggt um sæti í úrslitakeppninni sem tekur við að deildarkeppninni lokinni. Fimm stigum munar á Skjern og Ribe-Esbjerg sem er í níunda sæti. Ágúst Elí Björgvinsson og félagar í Kolding er í áttunda sæti og eiga bærilega góða von um að halda því sæti til loka og komast þar með í úrslitakeppnina.
Elvar Örn skoraði tvö mörk í kvöld í tveimur skotum. Hann átti eina stoðsendingu og þótti einu sinni full harðhentur í vörninni og uppskar brottrekstur fyrir vikið.
Bjerringbro/Silkeborg er í fjórða sæti með 31 stig og er átta stigum á eftir Viktori Gísla Hallgrímssyni og samherjum í GOG sem tróna á toppnum.
Staðan í dönsku úrvalsdeildinni í karlaflokki.
