„Þetta var mjög ánægjulegt, mikill heiður,“ sagði Einar Bragi Aðalsteinsson við handbolta.is í gærkvöld eftir að hann hafði tekið þátt í sínum fyrsta A-landsleik,í handknattleik. Einar Bragi lék með síðustu sjö mínúturnar í stórsigri íslenska landsliðsins á Eistlendingum, 50:25, í fyrri umspilsleiknum um sæti á heimsmeistaramótinu.
Einar Bragi, sem lék með HK upp í meistaraflokke n færði sig um set yfir til FH fyrir tveimur árum, var í bronsliðinu á HM 21 árs landsliða á síðasta ári.
Faðir og bróðir í landsliðinu
Einar Bragi fetaði þar með í fótspor föður síns Aðalsteins Jónssonar sem lék nokkra landsleiki í handknattleik á árunum 1986 og 1987. Eldri bróðir Einars Braga, Arnór Sveinn, á 12 A-landsleiki í knattspyrnu.
Vonaði það
Einar Bragi sem leikur með deildarmeisturum FH og hefur gert það gott var óvænt kallaður til æfinga með landsliðinu á mánudaginn þegar stefndi í að fjórir leikmenn af 18 sem valdir voru í landsliðshópinn væru óleikfærir vegna meiðsla. „Ég sannarlega vonaði það,“ sagði Einar Bragi spurður hvort hann hafi reiknað með að verða í landsliðsbúningnum tveimur sólarhringum síðar.
„Fyrst og fremst var gaman að taka þátt í æfingunum. Ég naut þeirra í botn.“
Einar Bragi átti eina stoðsendingu og var hvergi banginn við að skjóta á markið á þeim mínútum sem hann fékk en hafði ekki heppnina með sér. Koma tímar og koma ráð.
