Handknattleikssambönd fimm þjóða í Evrópu hafa sýnt áhuga á að halda Evrópumót kvenna í handknattleik árið 2026. Til stóð að mótið færi fram í Rússlandi en eftir innrás Rússa í Úkraínu á síðasta ári þótti ljóst að mótið færi tæplega fram í Rússlandi. Í sumar hjó Handknattleikssamband Evrópu, EHF, á hnútinn og óskaði eftir að heyra frá áhugasömum ríkjum sem vildu halda EM kvenna í desember 2026.
Fjórar umsóknir hafa verið sendar inn frá fimm þjóðum, eftir því sem EHF greinir frá. Tékkar og Pólverjar sýna áhuga á að halda mótið í sameiningu auk þess sem handknattleikssambönd Rúmeníu, Spánar og Tyrklands hafa sent inn hvert sína umsóknina.
Þjóðirnar fimm hafa tíma til 25. október til að staðfesta áhuga sinn og leggja inn fullgilda umsókn. Í framhaldinu mun EHF fara yfir umsóknir og ganga úr skugga um að kröfum vegna mótahaldsins verði mætt. Ákvörðun verður síðan tekin á fundi framkvæmdastjórnar EHF í Þýskalandi 27. janúar hver hreppir hnossið.
Ljóst er að vinna verður hratt að undirbúningi mótsins sem fram á að fara frá 3. til 20. desember 2026 og verður með 24 þátttökuþjóðum. Undankeppni EM hefst haustið 2025 og dregið verður í riðla um vorið.
Undankeppni EM hefst í haust
Næsta Evrópumót kvenna í handknattleik, og það fyrsta með 24 þátttökuþjóðum, fer fram í Austurríki, Ungverjalandi og Sviss í desember á næsta ári. Undankeppnin hefst í haust og lýkur næsta vor. Ísland er í riðli með landsliðum Færeyja, Lúxemborgar og Svíþjóðar.
Ísland hafnaði í riðli með tveimur frændþjóðum
