Forráðamenn handknattleiksdeild Harðar slá ekki slöku við þessa daga í veðurblíðunni fyrir vestan. Þeir eru með pennann á lofti á hverjum degi og annað hvort framlengja samninga við leikmenn eða skrifa undir samninga við nýja leikmenn.
Í morgun tilkynnti Hörður að japanski landsliðsmaðurinn Kenya Kasahara hafi skrifað undir nýjan tveggja ára samning við félagið. Þetta gerist í þann mund sem Kasahara er að búa sig undir að leika með japanska landsliðinu á Ólympíuleikunum í París. Leikarnir verða þeir aðrir í röð sem Kasahara tekur þátt í.
Kasahara endurnýjaði kynnin við Hörð á síðasta sumri eftir eins árs dvöl í Póllandi. Hann hafði áður leikið með liði félagsins frá 2020 til 2022.
„Kasa er þekktur fyrir kattarmerkið sem hann gerir, sem hefur orðið að einkennistákni hans. Við dáumst að því hversu eljusamur og einbeittur hann er, því bíðum við spennt eftir að fá Kasa heim til Ísafjarðar,“ segir í tilkynningu Harðar í morgun og ljóst er að Ísfirðingar eru í sjöunda himni með að halda kappanum innan sinna vébanda.
Hörður leikur í Grill 66-deild karla á næstu leiktíð.