Fyrsta heimaleik Kristjáns Arnar Kristjánssonar með franska liðinu PAUC sem fram átti að fara í kvöld hefur verið frestað en liðið átti að taka á móti Montpellier. Ástæðan fyrir frestuninni er sú að verulegar takmarkanir eru á komu áhorfenda á kappleiki í Aix þar sem félag hans er með bækistöðvar.
Tekjur af áhorfendum skipta félagslið gríðarlega miklu máli og þess vegna var ákveðið að fresta leiknum í þeirri von að hægt verði að koma honum á dagskrá þegar úr faraldri kórónuveiru dregur.
Um sannkallaðann stórleik er að ræða á milli þessara liða enda er Montpellier eitt af stærstu handknattleiksliðum Frakklands. Liðið vann m.a. Meistaradeild Evrópu fyrir tveimur árum.
Næsti leikur PAUC í frönsku 1.deildinni, efstu deild, verður á útivelli gegn Istres á næsta þriðjudag.
Kristján Örn sló í gegn í sínum fyrsta leik með PAUC gegn stórliði PSG. Hann skoraði m.a. sjö mörk í níu skotum og var valinn í lið umferðarinnar hjá franska íþróttadagblaði L’Equipe eins og handbolti.is skýrði frá.
