Ljóst er að fumlaus viðbrögð sjúkraþjálfara íslenska landsliðsins og sú ákvörðun að láta Hauk Þrastarson ekki taka þátt í síðari landsleiknum við Þýskaland á dögunum hefur m.a. orðið til þess að allar líkur eru á að Haukur leiki með Rhein-Neckar Löwen í heimsókn til Evrópumeistara SC Magdeburg í þýsku 1. deildinni á sunnudaginn.
Maik Machulla þjálfari Rhein-Neckar Löwen segir í dag að Haukur hafi hagað málum þannig að hann hefur getað æft með liðinu og verði þar af leiðandi klár í slaginn síðdegis á sunnudag.
Haukur fékk skot í aftanvert lærið eftir miðjan síðari hálfleik í fyrri viðureign Þýskalands og Íslands í Nürnberg á fimmtudaginn fyrir rúmri viku. Lærvöðvinn fékk strax kælingu og við tók meðhöndlun hjá sjúkraþjálfara íslenska landsliðsins.
Einnig var tekin ákvörðun um að tefla ekki á tvær hættur og kalla inn Andra Má Rúnarsson inn í hópinn í stað Hauks frekar en að láta á það reyna hvort hann gæti tekið þátt æfingum og síðari viðureigninni við Þýskaland sem fram fór í München.
