Franska landsliðið tryggði sér bronsverðlaunin á heimsmeistaramóti kvenna í handknattleik með sigri á Hollendingum, 33:31, í framlengdri viðureign í Rotterdam í dag. Dione Housheer jafnaði metin fyrir Hollendinga undir lok venjulegs leiktíma sem varð til þess að framlengja varð viðureignina. Franska liðið var mun sterkara frá fyrstu mínútu framlengingarinnar, hafði einfaldlega meira þrek þegar á hólminn var komið.
Frakkar hafa aldrei áður hreppt bronsverðlaun á HM kvenna. Þangað til í dag hafði Frakkland unnið þrenn gullverðlaun og fern silfurverðlaun.
Frakkar, sem unnu heimsmeistaratitilinn fyrir tveimur árum í úrslitaleik við Noreg, voru marki yfir í hálfleik gegn Hollendingum í dag, 12:11.
Franska liðið átti undir högg að sækja lengst af síðari hálfleiks. Svo virtist sem Hollendingar ætluðu að krækja í sín fjórðu verðlaun á heimsmeistaramóti kvenna. Þannig fór þó ekki. Franska liðið reis upp á afturlappirnar á síðustu 10 mínútum venjulegs leiktíma og var síðan töluvert betra í framlengingunni.
Sarah Bouktit var markahæst í franska liðinu með níu mörk. Pauletta Foppa og Léna Grandveau skoruðu fjögur mörk hvor.
Bo van Wetering og Romé Maarschalkerweerd skoruðu sex mörk hvor og voru atkvæðamestar hjá hollenska landsliðinu.
