„Kostnaðurinn hefur aldrei verið meiri en í sumar. Þetta er rosalega þungt mál fyrir foreldra og iðkendur og okkur hjá sambandinu,“ segir Róbert Geir Gíslason framkvæmdastjóri HSÍ í samtali við handbolta.is um þann mikla kostnað sem fellur á yngra landsliðsfólk vegna þátttöku á heims- og Evrópumótum í handknattleik í sumar. Kostnaðurinn eru nærri því tvöfaldast frá síðasta ári og er hæstur 600 þúsund á hvern leikmann U18 og U20 ára landsliða kvenna sem taka þátt í heimsmeistaramótum.
Hver unglingur þarf að greiða 600 þúsund til að leika fyrir Ísland á HM
Róbert segir enga viðbótarstyrki vera að fá frá afrekssjóði til þess að hlaupa undir bagga. Styrkirnir eru þeir sömu hvort sem HSÍ er með eitt landslið á stórmóti eða sex.
„Fyrirkomulagið er þannig að samböndum er hegnt fyrir að ná árangri,“ segir Róbert og nefnir sem dæmi að viðbótarstyrkur hafi ekki fengst á síðasta ári og né á þessu ári þrátt fyrir að A-landslið kvenna hafi öðlast þátttökurétt á stórmót í viðbót við karlalandsliðið.
„Það er ljóst að við verðum að fá mikla breytingu til batnaðar á afrekssjóði á næstunni ef ekki á illa að fara fyrir sérsamböndunum.
Þess utan þá á það ekki að byggjast á fjárhag foreldra hvort börn hafi efni á að vera í landsliðum Íslands. Það er galið fyrir land eins og Ísland. Þessu þarf að breyta strax,“ segir Róbert Geir Gíslason framkvæmdastjóri HSÍ.
Lengra myndskeiðsviðtal við Róbert er að finna efst í þessari frétt.
Einnig er hér fyrir neðan enn ítarlegra hljóðritað viðtal við Róbert.
