Geir Guðmundsson leikur ekki með Haukum næstu vikurnar. Hann tognaði á læri upp úr miðjum síðari hálfleik í viðureign Hauka og Stjörnunnar í Olísdeild karla á Ásvöllum síðasta miðvikudag. Reyndar fékk Geir í tvígang á sig slæm högg í síðari hálfleik í fyrrgreindum leik en varð að játa sig sigraðan eftir síðara atvikið.
Eftir því sem handbolti.is kemst næst er reiknað með að Geir verði frá keppni í fjórar til sex vikur. Geir var þar af leiðandi ekki með Haukum í gær gegn finnska liðinu HC Cocks og tekur ekki þátt í síðari viðureign liðanna í Riihimäki á laugardaginn.
Guðmundur mætti galvaskur
Á sama tíma og Geir er úr leik þá lék frændi hans, Guðmundur Hólmar Helgason, í fyrsta sinn á leiktíðinni með Haukum gegn HC Cocks í gær. Erfið meiðsli í öxl hafa sett strik í reikning Guðmundar Hólmar eins og handbolti.is sagði frá hér.
Guðmundur Hólmar lék í vörn Hauka í leiknum í gærkvöld og gaf ekkert eftir. Hann var skiljanlega ánægður með endurkomu sína á leikvöllinn þegar handbolti.is rakst á hann skömmu eftir að flautað var til leiksloka á Ásvöllum.
