„Við setjum pressu á okkur að halda áfram sömu leið og við vorum á síðasta keppnistímabili,“ segir Karen Tinna Demian fyrirliði ÍR í samtali við handbolta.is spurð um komandi keppnistímabil. ÍR var nýliði í Olísdeildinni á síðasta keppnistímabili, sýndi engin merki þess, hafnaði í fimmta sæti og komst í fyrstu umferð úrslitakeppninnar.
„Við sýndum að við áttum skilið að vera í Olísdeildinnni og ætlum að halda áfram að sýna fram á tilverurétt okkar í deildinni,“ sagði Karen Tinna ennfremur.
ÍR sækir Val í 1. umferð Olísdeildar kvenna í handknattleik í N1-höllinni á Hlíðarenda klukkan 14 í dag.
Skarð er fyrir skildi
Litlar breytingar hafa orðið á leikmannahópi ÍR á milli tímabila. Skarð er hinsvegar fyrir skildi að Sigrún Ása Ásgrímsdóttir línumaður sleit krossband í sumar og verður fjarri góðu gamni í vetur af þeim sökum.
„Undirbúningstíminn hefur gengið vel. Meðal annars fórum við í góða æfingaferð í viku til Tenerife sem heppnaðist vel. Ytra lékum við æfingaleik við Gróttu og höfum einnig leikið æfingaleiki hér heima á síðustu vikum sem hafa gengið þokkalega.
Við eigum Val í fyrsta leik. Ég held að það sé bara gott að byrja gegn meisturunum. Það þýðir ekkert minna,“ sagði Karen Tinna.
Helstu breytingar:
Komnar: Ingunn María Brynjarsdóttir (lánuð frá Fram), Sara Dögg Hjaltadóttir.
Lengra myndskeiðsviðtal er við Karen Tinnu efst í þessari grein.
Sjá einnig: Leikjadagskrá Olísdeilda.
Konur – helstu félagaskipti 2024
Fram er klúbbur sem vill alltaf vera í fremstu röð
Erum með mjög vel mannað lið og ætlum okkur að vera á toppnum
Verðum klár í slaginn við Hauka
Tími uppbyggingar stendur yfir hjá Stjörnunni
