Gísli Þorgeir Kristjánsson, leikstjórnandi Magdeburgar, var í gær kjörinn handknattleiksmaður ársins 2023. Gísli Þorgeir hlaut yfirburða kosningu hjá áhorfendum og aðdáendum þýska hanfknattleiksins, hlaut liðlega 48% atkvæða. Gísli Þorgeir er fjórði Íslandingurinn sem hefur verið kjörinn leikmaður ársins í Þýskalandi. Hann er kominn í fríðan flokk; við hlið Ólafs Stefánssonar, Guðjón Vals Sigurðssonar og Ómars Inga Magnússonar.
Ólafur var kjörinn leikmaður ársins 2001 og 2002, þá leikmaður Magdeburgar. Guðjón Valur var kjörinn 2006, sem leikmaður Gummersbach. Ómar Ingi, félagi Gísla Þorgeirs hjá Magdeburg, var krýndur leikmaður ársins í fyrra, 2022.
Magdeburg er því vígi handknattleiksmanna ársins í Þýskalandi.
Gísli Þorgeir verður í eldlínunni með SC Magdeburg í undanúrslitum Meistaradeildar í dag, í leik gegn Barcelona.
Undanúrslitaleikir Meistardeildar í dag, laugardag: Kl. 13.15 - SC Magdeburg - Barcelona Kl. 16 - Kielce - PSG. Sigurliðin í leikjunum á morgun mætast í úrslitaleik á sunnudag klukkan 16. Tapliðin leika um bronsið á sunnudaginn kl. 13.15. Hægt verður að fylgjast með öllum leikjum án endurgjalds á EHFtv.
