Góð frammistaða dugði skammt í 17. tapleiknum

Mjög góð frammistaða Elínar Jónu Þorsteinsdóttur í marki Vendsyssel dugði ekki til sigurs í dag gegn Silkeborg-Voel í dönsku úrvalsdeildinni í handknatleik í dag. Elín Jóna varði 13 skot, var með ríflega 37% hlutfallsmarkvörslu þegar Vendsyssel tapaði með þriggja marka mun, 27:24, á útivelli. Þetta var sautjándi tapleikur Vendsyssel í deildinni á leiktíðinni.

Leikmenn Silkeborg-Voel voru tveimur mörkum yfir að loknum fyrri hálfleik, 14:12. Staðan var jöfn, 20:20, þegar 13 mínútur voru til leiksloka. Eftir það var Silkeborg-Voel-liðið sterkara til leiksloka.
Steinunn Hansdóttir skoraði tvö mörk fyrir Vendsyssel úr jafnmörgum tilraunum.

Þegar þrjár umferðir eru eftir virðist fátt geta komið í veg fyrir að Vendsyssel falli niður um deild. Liðið er með þrjú stig eftir 19 leiki í neðsta sæti. Skanderborg er í næst neðsta sæti með sex stig. Horsens er þar fyrir ofan með 10 stig.

Hörð barátta er um efsta sætið. Odense Håndbold er efst með 34 stig. Viborg og ríkjandi meistarar í Esbjerg eru þar á eftir með 32 stig.