Arnór Þór Gunnarsson stýrði sínum mönnum í Bergischer HC til þriðja sigursins í þýsku 1. deildinni í handknattleik í dag. Nýliðarnir lögðu HSV Hamburg, 35:32, á heimavelli og færðust upp úr fallsæti og í 15. sæti deildarinnar af 18 liðum. Liðið stendur þar með jafnfætis Stuttgart og GWD Minden en sendi Wetzlar niður í næst neðsta sæti.
Einar Þorsteinn Ólafsson var ekki í leikmannahópi HSV Hamburg og munar um minna fyrir varnarleik liðsins. HSV Hamburg er í 10. sæti.
Molar eru líka brauð
Blær Hinriksson og félagar í botnliði Leipzig náðu öðru stiginu gegn Hannover-Burgdorf á heimavelli, 27:27. Í afleitri stöðu í neðsta sæti með þrjú stig eftir 14 leiki er eitt stig sannarlega betra en ekkert fyrir Leipzig. Molar hafa jú alltaf verið brauð.
Blær skoraði fimm mörk í sex skotum og gaf auk þess fjórar stoðsendingar. Frans Semper var markahæstur með sex mörk.
Heiðmar Felixson er aðstoðarþjálfari Hannover-Burgdorf sem er í 11. sæti með 12 stig.
Lemgo lagði meistarana
Vonir ríkjandi meistara, Füchse Berlin, á að verja titilinn dvínuðu nokkuð í kvöld þegar liðið tapaði á heimavelli fyrir Lemgo, 34:33. Berlínarliðið hefur þar með tapað átta stigum í fyrstu 14 leikjunum. Topplið SC Magdeburg hefur ekki tapað nema einu stigi í 13 leikjum og Flensburg fimm stigum.
Lemgo komst upp fyrir Füchse Berlin og situr nú í 5. sæti með 21 stig eftir 14 leiki. Lemgo hefur komið mörgum í opna skjöldu á tímabilinu.
Staðan:
