Grænlenska handknattleikssambandið, TAAK, er í fjárhagsþrengingum og verður að skera niður útgjöld það sem eftir lifir árs auk þess að draga verulega saman seglin á næsta ári. Hvorki karla- né kvennalandsliðin taka þátt í kappleikjum það sem eftir lifir árs auk þess sem æfingabúðir hafa verið felldar niður. Eina verkefni sambandsins á síðari hluta ársins er þátttaka 18 ára landsliðs kvenna á heimsmeistaramótinu sem fram fer í Kína frá 14. til 25. ágúst.
„Við eigum ekki túskilding með gati. Síðasta ár reyndist kostnaðarsamt með forkeppni HM kvenna og síðan þátttöku á heimsmeistaramótinu í Danmörku og Noregi. Þessi verkefni reyndust afar kostnaðarsöm og átu hreinlega upp eigið fé okkar,“ segir Carsten Olsen talsmaður sambandsins í samtali við grænlenska sjónvarpið, KNR.
Opinber stuðningur við sambandið nemur um 850 þúsund dönsku krónum á árinu, jafnvirði um 17 milljónir íslenska króna.
Olsen segir að það litla sem sambandið hafi úr að spila fjárhagslega á næsta ári verði lagt í kvennalandsliðið. Það tekur þátt þátt í forkeppni HM á næsta ári og getur þar með hugsanlega krækt í farseðil á HM sem fram fer í Hollandi og Þýskalandi í desember 2025. Karlaliðið verður að látið sitja á hakanum á næsta ári nema að verulega hlaupi á snærið, fjárhagslega.
Herða verður róðurinn í leit að fleiri samstarfsfyrrtækjum sem tilbúin eru að leggja handknattleikssambandinu lið.
