„Sérstaklega er gremjulegt að falla út á þennan hátt, eftir frábæru byrjun hjá okkur og yfirburðastöðu eftir 20 mínútur,“ sagði Björgvin Páll Gústavsson markvörður Vals vonsvikinn þegar handbolti.is hitti hann að máli eftir að Valur tapaði fyrir Aftureldingu, 29:27, og féll úr leik í undanúrslitum Íslandsmótsins. Afturelding hlaut þrjá vinninga en Valur einn. Afturelding leikur til úrslita um Íslandsmeistaratitilinn við deildarmeistara FH.
Valur var með sex marka forskot eftir 17 mínútur, 11:5, og virtist ætla að leika sama leikinn og í annarri viðureign liðanna. Annað kom á daginn eða kvöldið.
„Spennustigið var gott og útlitið bjart en því miður. Við áttum aldrei að hleypa Aftureldingarliðinu inn í leikinn við þessa aðstæður,” sagði Björgvin Páll og bætti við að Aftureldingarliðið væri erfitt viðureignar.
„Aftureldingarliðið er frábært með mjög góða breidd, liðið leikur klókann handbolta og heldur vel í boltann ofan á öflugan varnarleik.“
Lítur í eigin barm
Björgvin Páll sagðist taka tapið að hluta til á sig en vildi minna gera út mistökum samherja sinni.
„Ef ég hefði varið betur í síðari hálfleik þá hefðum við tekið þetta. Ég verð bara að líta í eigin barm með það. Sóknarleikur okkar ekkert spes, ekki síst í síðari hálfleik. Við féllum á því að missa taktinn og hleypa Aftureldingu þar með inn í leikinn,“ sagði Björgvin Páll Gústavsson markvörður Vals sem var frábær í fyrri hálfleik með 13 varin skot, þar af þrjú vítaköst en náði alls ekki sama flugi í síðari hálfleik, ekkert fremur en margir samherja hans.
Sjá einnig:
Fyrsti úrslitaleikurinn í Krikanum á sunnudagskvöld
Olís karla: Leikjadagskrá, úrslitakeppni
Afturelding vann á Hlíðarenda – leikur til úrslita við FH
