Guðmundur Bragi Ástþórsson átti stórleik með TMS Ringsted í dag þegar liðið vann Ribe-Esbjerg, 31:27, á útivelli í dönsku úrvalsdeildinni í handknattleik. Guðmundur Bragi skoraði 10 mörk í 11 skotum og gaf tvær stoðsendingar. Ekkert markanna skoraði Hafnfirðingurinn úr vítaköstum.
Ísak Gústafsson stóð einnig fyrir sínu og skoraði fimm mörk í sex skotum auk einnar stoðsendingar.
TMS Ringsted veitti svo sannarlega ekki af sigrinum í dag. Liðið er í botnbaráttu og lyftist upp úr næst neðsta sæti upp í 12. sæti af 14 liðum deildarinnar með 12 stig að loknum 17 umferðum af 26.
Elvar Ásgeirsson náði sér lítt á strik í leiknum. Hans eina markskot missti marks. Hann átti tvær stoðsendingar. Ribe-Esbjerg nálgast neðstu liðin, situr í 10. sæti með 13 stig, sjónarmun fyrir ofan Fredericia HK sem lagði Nordsjælland, 33:26.
Naumur sigur hjá Donna
Kristján Örn Kristjánsson, Donni, lék afar vel fyrir Skanderborg er liðið vann HØJ, 35:34, á útivelli. Donni skoraði sex mörk í 10 skotum og gaf þrjár stoðsendingar. Skanderborg er í fjórða sæti deildarinnar með 22 stig eftir 17 leiki, stigi á eftir Mors-Thy.
Christoffer Sundsgaard Dreyer skoraði sigurmark Skanderborg úr hraðaupphlaupi á síðustu sekúndum eftir að besti maður HØJ í leiknum, Michael Damgaard, glopraði frá sér boltanum þegar fjórar sekúndur voru eftir af leiktímanum.
