Guðmundur Bragi Ástþórsson og liðsfélagar í Bjerringbro/Silkeborg leika til úrslita í dönsku bikarkeppninni á morgun eftir sigur á Grindsted GIF, 37:23, í undanúrslitaleik í Jyske Bank Boxen í Herning í dag að viðstöddum 8.500 áhorfendum.
Bjerringbro/Silkeborg mætir Aalborg Håndbold í úrslitaleiknum á morgun. Aalborg Håndbold vann SønderjyskE í síðari undanúrslitaleik dagsins, 24:22. Danski landsliðsmaðurinn Thomas Arnoldsen var markahæstur hjá Álaborgarliðinu með fimm mörk. Sander Sagosen sem gekk til liðs við Aalborg um miðja vikuna var á leikskýrslu en kom ekkert við sögu í viðureigninni.
Guðmundur Bragi kom lítið við sögu í leiknum í dag. Patrick Boldsen skoraði sjö mörk og var markahæstur hjá Bjerringbro/Silkeborg. Heimsmeistarinn Rasmus Lauge var næstur með fimm mörk ásamt Nikolaj Læsø.
