- Auglýsing -
- Guðmundur Bragi Ástþórsson og félagar í Bjerringbro/Silkeborg töpuðu fyrir GOG í upphafsleik dönsku úrvalsdeildarinnar í handknattleik í gærkvöld, 30:27. Leikurinn fór fram á heimavelli GOG. Guðmundur Bragi átti eina stoðsendingu í leiknum.
- Nikolaj Læsö skoraði átta mörk fyrir Bjerringbro/Silkeborg og var markahæstur auk fimm stoðsendinga. Mest kvað að Henrik Jakobsen hjá GOG. Hann skoraði sjö mörk, átti tvær stoðsendingar og var í tvígang vikið af leikvelli.
- Bjerringbro/Silkeborg og GOG mætast hugsanlega aftur á næstunni í átta liða úrslitum bikarkeppninnar. Dregið var í gær og dróst Bjerringbro/Silkeborg gegn annað hvort Team Sydhavsøerne eða GOG en þau eiga eftir að gera upp reikningana í 16-liða úrslitum.
- Grétar Ari Guðjónsson varði sjö skot, þar af tvö vítaköst, þann tíma sem hann stóð í marki US Ivry í gær gegn Angers í eins marks tapi, 24:23, á útivelli í 32-liða úrslitum frönsku bikarkeppninnar í handknattleik. Darri Aronsson er ennþá frá vegna meiðsla og lék ekki með US Ivry í leiknum.
- Króatíski landsliðsmaðurinn Zvonimir Srna gengur til liðs við Montpellier frá RK Zagreb næsta sumar. Franska liðið sagði frá tíðindunum í gærmorgun. Srna þykir öflugur leikmaður sem gert hefur það gott m.a. með landsliðinu og er talinn geta orðið búhnykkur fyrir franska liðið.
- Ekki eru þó eingöngu gleðitíðindi úr herbúðum Montpellier þessa dagana. Stas Skube meiddist á hné á dögunum og leikur ekki með liðinu næstu mánuði. Leitað er að manni sem getur hlaupið í skarðið. Einnig bendir allt til þess að franski landsliðsmaðurinn Karl Konan gangi til liðs við PSG eftir ár.
- Keppni í frönsku 1. deildinni hefst á föstudaginn. Tveir íslenskir handknattleiksmenn leika í deildinni í vetur, báðir með US Ivry. Það er Hafnfirðingarnir Darri Aronsson og Grétar Ari Guðjónsson. Sá síðarnefndi kom til Parísarliðsins í sumar eftir tvö ár hjá Sélestat. Eins og getið er um að ofan er Darri frá keppni vegna meiðsla.
- Auglýsing -
