Tilen Kodrin tryggði Gummersbach annað stigið gegn Flensburg á útivelli í gríðarlegum baráttuleik í þýsku 1. deildinni í handknattleik í kvöld. Kodrin skoraði jöfnunarmarkið á síðustu sekúndu, 37:37. Nokkrum sekúndum áður var Marko Grgic nærri búinn að innsigla sigur Flensburg en þrumuskot hans small í markstönginni hjá Gummersbach-liðinu sem leikur að vanda undir stjórn Guðjóns Vals Sigurðssonar.
Gummersbach skoraði tvö síðustu mörkin og fer þar með með annað stigið í farteskinu heim frá Flensburg en fá félög hafa náð því á leiktíðinni.
Flensburg var þremur mörkum yfir í hálfleik, 20:17, og var lengi vel með yfirhöndina.
Elliði Snær skoraði fimm
Elliði Snær Viðarsson skoraði fimm mörk fyrir Gummersbach og Teitur Örn Einarsson eitt mark. Julian Köster var markahæstur með sjö mörk.
Marko Grgić skoraði 13 mörk fyrir Flensburg og var markahæstur. Liðið er í öðru sæti með 23 stig eftir 14 leiki, er tveimur stigum og leik á eftir Magdeburg. Gummersbach situr í fimmta sæti með 20 stig eftir 14 leiki.
Stórsigur Magdeburg
Magdeburg vann stórsigur á GWD Minden, 36:21, á útivelli í kvöld en eins og gefur að skilja var um leik kattarins að músinni. Gísli Þorgeir Kristjánsson skoraði fjögur mörk og gaf níu stoðsendingar fyrir Magdeburg. Elvar Örn Jónsson skoraði þrjú mörk og átti eina stoðsendingu. Ómar Ingi Magnússon skoraði tvö mörk úr vítaköstum og gaf sex stoðsendingar.
Jafnt í Göppingen
Jafntefli var í háspennuleik Göppingen og MT Melsungen, 26:26, á heimavelli Göppingen. Ýmir Örn Gíslason fyrirliði Göppingen skoraði eitt mark og var einu sinni vikið af leikvelli.
Arnar Freyr Arnarsson skoraði þrjú mörk fyrir MT Melsungen. Reynir Þór Stefánsson var í fyrsta sinn með í leikmannahóp Melsungen í leik í þýsku 1. deildinni. Hann kom lítið við sögu.
Staðan:
