Gunnar Magnússon þjálfari karlaliðs Aftureldingar verður Degi Sigurðssyni nýráðnum þjálfara króatíska karlalandsliðsins til halds og trausts við ákveðin verkefni, m.a. sem snúa að leikgreiningu. Dagur segir frá þessu í samtali við Vísir.
„Hann ætlar að hjálpa mér að heiman og halda utan um leikgreininguna fyrir mig, svona rétt á meðan ég kynnist mínu samstarfsfólki hérna úti. Ég er ævinlega þakklátur honum fyrir að taka það að sér,“ segir Dagur í samtali við Vísir.
Gunnar er þraureyndur á þessu sviði eins og öðru sem snýr að þjálfun handknattleiksliða. Hann vann m.a. þétt með Guðmundi Þórði Guðmundssyni um langt árabil með landsliðinu, ekki síst við leikgreiningu, auk þess að stýra landsliðinu í fyrravor ásamt Ágústi Þór Jóhannssyni.
Gunnar lét af starfi íþróttastjóra HSÍ um síðustu áramót.
Dagur segir forsvarsmenn króatíska handknattleikssambandsins hafa tekið mjög vel í að Gunnar taki að sér ákveðin verkefni enda í mörg horn að líta hjá Degi í nýju starfi.
Vonast Dagur til að Gunnar verði með sér í Þýskalandi þegar króatíska handknattleikslandsliðið tekur þátt í forkeppni Ólympíuleikana 14. til 17. þessa mánaðar.
Auk Gunnars verður Denis Spoljaric samstarfsmaður Dags með króatíska landsliðið en sá síðarnefndi lék undir stjórn Dags hjá Füchse Berlin fyrir nokkrum árum.
