Hákon Daði Styrmisson hefur gengið til liðs við uppeldisfélag sitt ÍBV frá þýska félaginu Eintracht Hagen. Skrifaði hann undir samning sem gildir út yfirstandandi keppnistímabil. Ljóst er að um sannkallaðan búhnykk er að ræða fyrir ÍBV-liðið sem situr í sjötta sæti Olísdeildar að loknum 15 umferðum af 22.
Hákon Daði, sem er 28 ára vinstri hornamaður, hefur leikið í Þýskalandi frá sumrinu 2021 þegar hann gekk til liðs við Gummersbach. Frá haustinu 2023 hafði Hákon Daði leikið með Hagen í B-deildinni.
„Hákon þarf vart að kynna en hann kemur til liðsins frá þýska liðinu Eintracht Hagen og mun án efa styrkja hópinn út yfirstandandi tímabil. Við bjóðum Hákon Daða hjartanlega velkominn aftur til ÍBV og hlökkum til að sjá hann láta til sín taka á parketinu,“ segir í tilkynningu frá handknattleiksdeild ÍBV.
Hákon Daði fór mikinn með ÍBV áður en hann hélt út í atvinnumennsku og var drjúgur í markaskorun. Einnig lék Hákon Daði með Haukum um tveggja ára skeið.
Hákon Daði á að baki 16 leiki með landsliðinu sem hann hefur skoraði í 26 mörk. Hann var í keppnishópnum á HM í Svíþjóð 2023, tók þátt í 6 leikjum og skoraði 1 mark.
Nú þegar hlé hefur verið gert á keppni 2. deild þýska handknattleiksins er Hákon Daði næst markahæstur í deildinni með 112 mörk í 17 leikjum og 76% skotnýtingu.
Í Þýskalandi varð Hákon Daði tvisvar fyrir því óláni að slíta krossband í hné sem setti eins og gefur að skilja stórt strik í reikninginn.
Upp úr slitnaði hjá Val
Heimildir handbolta.is herma að Hákon Daði hafi einnig átt í alvarlegum viðræðum við Val en að upp úr viðræðum hafi slitnað í upphafi vikunnar þegar Valur taldi sig ekki geta komið til móts við kröfur Hákons Daða.
Staðan og næstu leikir í Olísdeildum.
