Litháísku handboltahjónin Karolis Stropus og Roberta Stropé leika ekki áfram með liðum Selfoss á næsta keppnistímabili eftir tveggja ára veru hjá félaginu. Eftir því sem næst verður komist fluttu þau af landi brott í morgun og hafa ákveðið að setjast að í Litháen þaðan sem þau eru. Hafa þau jafnframt í hyggju að leggja handknattleiksskóna á hilluna.
Roberta lék í gærkvöld sinn síðasta leik fyrir Selfoss og kvödd með þakklætisvotti frá Selfossliðinu eftir oddaleik Selfoss og ÍR í umspili Olísdeildar kvenna. Roberta hefur glímt við meiðsli undanfarin ár og mun hafa fengið nóg af þyrnum stráðum leikvellinum af þeim sökum. Ákvörðun hennar tengist ekki falli Selfossliðsins úr Olísdeildinni.
Karolis og Roberta gengu til liðs við Selfoss fyrir tveimur árum. Hún hafði áður verið með Aftureldingu 2019/2020 en varð fyrir því óláni að slíta krossband. Þegar Roberta hafði jafnað sig samdi hún við Selfoss vorið 2021 um leið og Karolis.
Karolis kom hingað til lands fyrsta leiktímabilið 2015/2016 og lék með Víkingi. Árið eftir samdi hann við Akureyri handboltafélag en sleit hásin á miðju tímabili. Árið 2019 kom Karolis aftur hingað til lands og lék með Aftureldingu 2019/2020 og Þór 2020/2021. Eftir það lá leið þeirra austur á Selfoss.
