Í Handboltahöllinni á Handboltapassanum á mánudagskvöld var 14. umferð Olísdeildar kvenna gerð upp. Fram fagnaði naumum 21:20 sigri á KA/Þór í KA heimilinu á Akureyri eftir gífurlega spennuþrungnar lokamínútur.
Einar Ingi Hrafnsson, annar sérfræðinga Handboltahallarinnar, fór yfir tíðindamiklar lokamínútur þar sem Bernadett Leiner í marki KA/Þórs varði til að mynda vítakast frá Huldu Dagsdóttur og sömuleiðis frákastið sem Hulda náði aðeins nokkrum sekúndum fyrir leikslok.
„Framararnir voru komnir með fjögurra marka forskot þegar sjö mínútur lifðu leiks. Þá kemur þessi kafli. Á einhvern ótrúlegan hátt er KA/Þór komið í þá stöðu að það eru átta sekúndur eftir þegar þær keyra þarna upp og möguleikinn til staðar.
Framarar sluppu heldur betur með skrekkinn því þetta skot í lokin er hársbreidd framhjá,“ sagði Einar Ingi. Síðasta skot leiksins átti Bergrós Ásta Guðmundsdóttir en tókst henni ekki að jafna metin fyrir KA/Þór.
Myndskeið af umræðunni um æsispennandi lokamínútur leiksins má sjá hér fyrir ofan.
