Hafdís Renötudóttir, markvörður Vals, er leikmaður 13. umferðar Olísdeildar kvenna að mati Handboltahallarinnar á Handboltapassanum og skyldi engan undra.
Hafdís varði 16 skot af 29 sem komu á markið í stórsigri á KA/Þór og var þannig með 55% hlutfallsmarkvörslu.
„Orð eru óþörf,“ sagði Hörður Magnússon um valið á Hafdísi og uppskar hlátur frá Einari Inga Hrafnssyni, öðrum sérfræðinga Handboltahallarinnar.
Leikmaður umferðarinnar í fyrsta sinn
Landsliðsmarkvörðurinn er á sínum stað í markinu í liði 13. umferðar, er í liði umferðarinnar í þriðja sinn og leikmaður umferðarinnar í fyrsta sinn.
Liðsfélagi hennar Lovísa Thompson er í liðinu í fimmta sinn og Harpa María Friðgeirsdóttir hjá Fram sömuleiðis. Ásdís Guðmundsdóttir hjá Fram er í liðinu í þriðja sinn.
Birna Berg Haraldsdóttir hjá ÍBV er í liðinu í sjötta sinn og nafna hennar og liðsfélagi í ÍBV Birna María Unnarsdóttir í fyrsta sinn.
Sonja Lind Sigsteinsdóttir er í liðinu í annað sinn og annað skiptið í röð.
Magnús Stefánsson er þá þjálfari umferðarinnar í annað sinn.
Lið 13. umferðar má sjá í heild sinni í myndskeiðinu hér að ofan.
