Í Handboltahöllinni á Handboltapassanum á mánudagskvöld var 13. umferð Olísdeildar kvenna gerð upp. Þar var rætt um afar óhugnanlegt atvik þegar Matea Lonac markvörður KA/Þórs skall harkalega með höfuðið á markstöngina í tapi liðsins fyrir Val.
„Hún virðist ekki átta sig neitt á því hvar hún er stödd. Það skekkist markið þarna. Það er ótrúlegt að ekki hafi farið verr,“ sagði Einar Ingi Hrafnsson, sérfræðingur Handboltahallarinnar.
„Hún gengur út af,“ benti Hörður Magnússon þáttastjórnandi á.
Skall á stönginni og var flutt á sjúkrahús – Slapp við beinbrot
Jónatan Þór Magnússon þjálfari KA/Þórs sagði í samtali við handbolta.is um síðustu helgi að Lonac hafi fengið heilahristing en að sem betur fer hafi hún hvorki kinnbeins- né kjálkabrotnað.
Þarf að vanda til verka
„Hún fer í eitthvað tékk uppi á sjúkrahúsi og kemur í ljós að hún fékk heilahristing. Annað, brot eða eitthvað, er ekki til staðar. En þetta er auðvitað stelpa sem er með sögu,“ bætti Einar Ingi við.
„Hún spilar með þetta höfuðband út af sögu,“ sagði Ásbjörn Friðriksson annar sérfræðinga Handboltahallarinnar.
„Hún var frá í að verða eitt ár fyrir ekki svo löngu út af höfuðáverkum. Það þarf að vanda til verka núna upp á framhaldið með hana,“ sagði Einar Ingi þá.
Myndskeið af atvikinu óhugnanlega ásamt umræðu um það má sjá hér fyrir ofan. Rétt er að vara viðkvæma við myndefninu.
