„Þetta gekk mjög vel og var ótrúlega skemmtilegt,“ segir Sunna Jónsdóttir handknattleikskona og þroskaþjálfi spurð um fyrstu æfinguna sem HSÍ og íþróttafélagið Ösp stóð að fyrir börn og ungmenni með fatlanir. Verkefninu var hleypt af stokkunum í Klettaskóla í gær þar sem framvegis verða æfingar milli kl. 17 og 18.30, hvern miðvikudag.
„Gleðin skein úr hverju andliti og það tóku allir þátt enda á handbolti að vera fyrir alla,“ segir Sunna sem yfirþjálfari æfinganna en með henni eru Björn Eiríksson, íþróttakennari í Klettaskóla og Halldóra Ingvarsdóttir, þroskaþjálfi.
„Íþróttir geta verið sameiningartákn og það eiga allir að geta verið í einhversskonar hlutverki. Ég þekki það til dæmis úr Vestmannaeyjum þar sem Ægir stendur fyrir boccia og handbolta æfingum, að iðkendur þar eru helstu og bestu stuðningsmenn ÍBV og eru stór partur af öllu samfélaginu í heild,“ segir Sunna ennfremur
Fyrstu skrefin
„HSÍ er að setja af stað þetta frábæra og spennandi verkefni í samvinnu við Öspina og það á eftir að þróast enn frekar. Ég veit það á að standa fyrir einhversskonar viðburðum með þessum hóp í vetur og við hlökkum til framhaldsins.
Við hvetjum alla til að koma og prufa að vera með okkur,“ segir Sunna Jónsdóttir. Óhætt er að taka undir með henni.
Sjá einnig: Handbolti fyrir alla: HSÍ og íþróttafélagið Ösp hefja samstarf við æfingar
