Að þessu sinni fór kvartettinn í hlaðvarpsþættinum Handboltinn okkar yfir stöðuna í kvennaboltanum þar sem þeir fóru yfir helstu breytingar á liðunum í Olísdeild kvenna. Þeir félagar spá því að deildin verði enn meira spennandi heldur en á síðustu leiktíð þar sem fleiri lið munu gera atlögu að þeim stóra í vor. En á sama tíma lýsa þeir yfir smá áhyggjum af stöðu mála í Kópavoginum og hreinlega spyrja sig hvað sé í gangi í herbúðum HK. Kvartettinn var sammála um að þeir myndu vilja sjá meira frá Kópavogsliðinu á komandi leiktíð.
Þá fóru þeir aðeins inná það hvenær þessi nefnd sem HSÍ ætlar að setja á fót um kvennahandboltann myndi verða tilkynnt og hvað væri ætlast til af þeirri nefnd.
Einnig fóru þeir aðeins yfir leiki íslensku liðanna í Evrópukeppnunum og fögnuðu því hversu mörg íslensk lið taka þátt í Evrópukeppnum á þessari leiktíð. Gera þeir félagar sér vonir um að öll liðin komist í gegnum sínar viðureignir.
Nýjasta þáttinn er hægt að hlusta á með því að smella á hér fyrir neðan. Eins er hér að finna neðar þáttinn um Olísdeild karla sem kom út á laugardaginn var og áður hefur verið greint frá á handbolta.is.
