Alpla Hard er komið í undanúrslit efstu deildar austurríska handknattleiksins eftir annan sigur á grannliðinu Bregenz, 30:29, í viðureign liðanna í gær. Bregenz var marki yfir í hálfleik, 15:14. Litáinn Karolis Antanavicius, sem gengur til liðs við GWD Minden í sumar, skoraði sigurmark Alpla Hard á síðustu sekúndu leiksins.
Tumi Steinn Rúnarsson skoraði fimm mörk og gaf tvær stoðsendingar fyrir lið Hard. Þrjú markanna skoraði Tumi Steinn úr vítaköstum. Honum var einu sinni vikið af leikvelli. Tumi Steinn jafnaði metin, 28:28, þegar skammt var til leiksloka í afar jafnri og spennandi viðureign.
Alpla Hard vann einnig fyrri leikinn við Bregenz með eins marks mun, 24:23.
Hannes Jón Jónsson hefur verið þjálfari Alpla Hard í fjögur ár. Hann framlengdi samning sinn við félagið í upphafi þessa árs.
Sjá einnig: Hannes Jón heldur sig í Austurríki
Auk Alpla Hard eru Krems og Linz komin áfram í undanúrslit. Staðan er jöfn hjá Aon Fivers og Handball Tirol. Hvort lið hefur einn vinning. Linz varð meistari á síðasta ári eftir úrslitaeinvígi við Alpla Hard.
