Forsvarsmenn Harðar á Ísafirði hyggjast ekkert aðhafast vegna þess að Haukar tefldu fram of mörgum A-liðsmönnum í viðureign ungmennaliðs Hauka og Harðar í Grill 66-deildinni á þriðjudagskvöld.
Eins og kom fram á handbolti.is á þriðjudagskvöld þá gerðu Harðarmenn athugasemd við leikskýrsluna vegna þess að fimm leikmenn sem voru á skýrslu Olísdeildarliðs Hauka í næsta leik á undan tóku þátt í viðureign Hauka U og Harðar. Reglurnar kveða á um að hámark fjórir leikmenn, sem léku síðasta leik með aðalliði félags, hafa heimild til að leika með ungmennaliði félagsins, uppfylli þeir aldursskilyrðið.
„Hörður hefur komið þeim skilaboðum afar skýrt til HSÍ, Handknattleikssambands Íslands, að félagið vilji ekki að úrslitum leiksins sé breytt eða nokkuð gert því allir gera jú mistök og úrslit handboltaleikja eiga að ráðast á vellinum. Ekki utan hans. Ef við héldum öðru fram nú værum við einfaldlega ekki samkvæmir sjálfum okkur,“ sagði í yfirlýsingu Harðar í gærkvöld sem gefin var út í eftir sigur Harðar á ungmennaliði Selfoss í Grill 66-deildinni.
