Handknattleikslið Harðar á Ísafirði hefur ekkert getað haft æfingar að einhverju marki ennþá þrátt fyrir að nýr þjálfari, Ungverjinn Endre Koi, hafi verið ráðinn. Viðgerðir og viðhald á íþróttahúsunum á Torfnesi á Ísafirði og einnig í Bolungarvík setja strik í reikninginn og koma að mestu eða að öllu í veg fyrir æfingar Harðverja.
Eftir því sem handbolti.is hefur fregnað er ekki útilokað að reynt verði að æfa í íþróttahúsinu á Flateyri. Á Flateyri er góður íþróttasalur þótt ekki sé hann af löglegri stærð til keppni í handknattleik. Hann er engu að síður nothæfur til æfinga upp að ákveðnu marki, ef blaðamanni handbolta.is bregður ekki fullkomlega minnið.
Hörður leikur í Grill 66-deild karla á næstu leiktíð eftir eins árs veru í Olísdeld karla. Stefnan er að fara rakleitt upp aftur og hefur m.a. verið samið við nokkra leikmenn liðsins á síðustu leiktíðum um að halda áfram auk þess sem Japaninn Kenya Kasahara mætir til leiks aftur eftir eins árs veru í Póllandi.
Hörður er skráður til leiks á Hafnarfjarðarmóti karla sem hefst þriðjudaginn 22. ágúst og stendur yfir til 26. Ekki verður flautað til leiks í Grill 66-deildinni fyrr en laugardaginn 23. september. Hörður á heimaleik í fyrstu umferð gegn ungmennaliði Víkings.
