Harpa Rut Jónsdóttir lauk handknattleiksferlinum í dag með því að taka við silfurverðlaunum að loknum oddaleik liðs hennar, GC Amicitia Zürich, gegn LC Brühl Handball um meistaratitilinn í svissnesku úrvalsdeildinni. LC Brühl vann, 31:30. Framlengja varð leikinn til þess að knýja fram sigur á annan hvorn veginn.
Allar viðureignir liðanna um meistaratitilinn voru hnífjafnar og tvær þeirra framlengdar.
Jafnt var að loknum hefðbundnum 60 mínútna leik í St Gallen, 26:26. Harpa Rut skoraði ekki mark í leiknum.
Harpa Rut sagði frá því að Facebook í dag að framundan væri hennar síðasti handboltaleikur á ferlinu.
Harpa Rut er frá Akureyri en hefur búið í Sviss frá 2017. Hún hefur leikið með GC Amicitia Zürich í tvö ár en var þar á undan með LK Zug og varð m.a. landsmeistari og bikarmeistari með liðinu vorið 2021. Í dag bætti Harpa Rut silfurverðalunum í safnið.
