Þvert á það sem margir reiknuðu með þá veitti Stjarnan liðsmönnum Hauka hörku mótspyrnu í viðureign liðanna í fyrstu umferð Olísdeildar kvenna í handknattleik í TM-höllinni í dag. Aðeins skildu tvö mörk liðin að, 28:26, Haukum í hag þegar upp var staðið en forskot Hauka var þrjú mörk að loknum fyrri hálfleik, 18:15.
Allan fyrri hálfleik voru Haukar með yfirhöndina. Var það ekki síst að þakka Margréti Einarsdóttur markverði sem varði afar vel. Stjörnuliðinu óx ásmegin þegar á hálfleikinn leið og með smá heppni hefði ekki þurft að muna nema einu marki að loknum 30 mínútum.
Framan af síðari hálfleik gekk hvorki né rak hjá Haukum í sóknarleiknum. Liðið skoraði aðeins eitt mark á fyrstu 10 mínútunum. Stjarnan komst marki yfir, 21:20, áður en Stefáni Arnarsyni, þrautreyndum þjálfara Hauka tókst að hressa upp á leikmenn sína, alltént nóg til þess að þeir sneru taflinu við og unnu.
Ef marka má þennan leik þá verður Stjarnan ekki í eins miklu basli og margir reiknuðu með nema þá aðeins að Haukar verði ekki eins öflugir og reiknað hefur verið með. Embla Steindórsdóttir, sem kom frá HK, styrkir liðið mikið og Elísabet Millý Elíasardóttir markvörður sýndi einnig góðan leik.
Mörk Stjörnunnar: Embla Steindórsdóttir 7, Helena Rut Örvarsdóttir 6, Anna Karen Hansdóttir 4/1, Eva Björk Davíðsdóttir 4/1, Vigdís Arna Hjartardóttir 2, Ivana Jorna Meincke 2, Stefanía Theodórsdóttir 1.
Varin skot: Elísabet Millý Elíasardóttir 15, 35,7%.
Mörk Hauka: Elín Klara Þorkelsdóttir 10/6, Ingeboerg Furunes 5, Sonja Lind Sigsteinsdóttir 4, Ragnheiður Sveinsdóttir 3, Alexandra Líf Arnarsdóttir 3, Ragnheiður Ragnarsdóttir 1, Rakel Oddný Guðmundsdóttir 1, Birta Lind Jóhannsdóttir 1.
Varin skot: Margrét Einarsdóttir 14/1, 35%.
Handbolti.is fylgist með leiknum í textalýsingu hér fyrir neðan.
