Fréttatilkynning frá Haus hugarþjálfunarstöð
Fimmtudaginn 27. apríl opnaði fyrsta þjálfunarstöðin á Íslandi sem sérhæfir sig í þjálfun hugarfarslegra þátta hjá íþróttafólki. Stöðin ber heitið Haus hugarþjálfunarstöð og er opnuð undir merki Hauss hugarþjálfunar.
Það er einróma álit allra sem á einhvern hátt koma að íþróttaiðkun og íþróttaþjálfun barna, unglinga og fullorðinna að þjálfun hugarfarslegra þátta skipti höfuðmáli fyrir vellíðan og árangur íþróttafólks á öllum aldri. Með hugarfarslegum þáttum er hér átt við þætti á borð við einbeitingu, sjálfstraust, þrautseigju, leiðtogafærni, samskiptafærni, liðsheild, aga og spennustjórnun.
Í fyrsta lagi eflir þjálfun þessara þátta íþróttaiðkandann sem einstakling og bætir í verkfæratösku hans verkfærum sem hjálpa viðkomandi að takast á við lífið og áskoranir þess, í öðru lagi eflir þjálfun hugarfarslegra þátta vellíðan íþróttaiðkandans í íþróttinni sjálfri og í þriðja lagi bætir þjálfunin getu iðkandans á íþróttavellinum. Þrátt fyrir að mikilvægi þessara þátta sé ótvírætt fyrir andlega vellíðan og frammistöðu íþróttafólks er þessum þáttum alltof lítill gaumur gefinn í reglulegri íþróttaþjálfun bæði ungmenna og fullorðinna.
Það þarf því ekki að fara mörgum orðum um hversu byltingarkennd opnun Hauss hugarþjálfunarstöðvar er í þeirri viðleitni að auka meðvitund íþróttafólks um mikilvægi reglulegrar hugarþjálfunar og að auka aðgengi að fræðslu og æfingatækjum til hugarþjálfunar.
Meðfylgjandi er hlekkur á stöðina þar sem má kynna sér hana betur.
Haus hugarþjálfunarstöð – Haus.is
Netfang: [email protected]
