„Ég hefði viljað vinna leikinn með meiri mun. Við klikkuðum á mörgum dauðafærum,“ sagði Skarphéðinn Ívar Einarsson leikmaður Hauka í samtali við handbolta.is eftir átta marka sigur Hauka á RK Jeruzalem Ormoz frá Slóveníu, 31:23, á Ásvöllum í kvöld í fyrri viðureign liðanna í 16-liða úrslitum í Evrópubikarkeppninni í handknattleik. Síðari leikurinn fer fram í Ormoz eftir viku.
Skarphéðinn Ívar skoraði átta mörk í leiknum með þrumufleygum og varð næst markahæstur Hauka. Segja má að Skarphéðinn Ívar hafi drifið áfram sóknarleik Hauka sem á tíðum var erfiður gegn líkamlega sterkum leikmönnum Ormoz.
Geggjað þegar skotin eru inni
„Það geggjað þegar skotin eru inni en það líka frábært að hafa alvöru skrokka á línunni til þess að blokka fyrir mann svo maður komist í færin.“
Skarphéðinn Ívar vonast til þess að forskotið dugi í síðari leiknum ytra eftir viku svo Haukar komist í átta liða úrslit Evrópubikarkeppninnar. Hann kvíðir ekki ferðlaaginu síðar í næstu viku enda öllu vanur ásamt samherjum sínum eftir ferðina til Aserbaísjan í lok nóvember.
Áður en að Slóveníuferðinni kemur með gistingu í Kaupmannahöfn mæta Haukar liði Stjörnunnar í Olísdeild karla á miðvikudagskvöld.
Lengra viðtal við Skarphéðinn Ívar er í myndskeiði ofar í þessari grein.
Vinsælt lesefni:
