Hefur ekki bitið úr nálinni af afleiðingum byltu

Hornamaðurinn Leó Snær Pétursson hefur verið fjarri góðu gamni í síðustu leikjum Stjörnunnar í Olísdeild karla. Hann hlaut slæma byltu á æfingu fyrir um hálfum mánuði með þeim afleiðigum að þungt högg kom á bakið. Leó Snær hefur ekki bitið úr nálinni með afleiðingar byltunnar en hefur notið góðrar aðhlynningar.

„Ég er í meðhöndlun hjá sjúkraþjálfara og er allur að koma til,“ sagði Leó Snær við handbolta.is. Leó Snær er markahæsti leikmaður Stjörnunnar í Olísdeildinni á keppnistímabilinu og afar örugg vítaskytta. Skarð er þar af leiðandi fyrir skildi að fjarveru hans.

„Ég á eftir að láta reyna á þetta svo það er erfitt að segja hvort ég verði með í næsta leik eða hvort ég verði að bíða lengur. Það kemur í ljós á næstu dögum,“ sagði Leó Snær Pétursson hornamaður Stjörnunnar. Hann hefur skorað 96 mörk í 17 leikjum í Olísdeildinni á tímabilinu.