Undir stjórn Heiðmars Felixsonar náði Hannover-Burgdorf óvæntu jafntefli við THW Kiel, 29:29, á heimavelli Kílarliðsins í þýsku 1. deildinni í handknattleik í gærkvöld. August Pedersen jafnaði metin fyrir Hannover-Burgdorf úr umdeildu vítakasti þegar leiktíminn var úti. Þótt vítakastsdómurinn hafi verið umdeildur þá má segja að stig Hannover-Burgdorf-liðsins hafi verið sanngjarnt eftir að hafa átti síst minna í leiknum og verið með yfirhöndina, 16:14, í hálfleik. THW Kiel tapar ekki oft stigum á heimavelli.
Vegna meiðsla var Hannover-Burgdorf ekki með línumann í hópnum og varð Heiðmar þar af leiðandi að grípa til þess ráðs að tefla fram skyttu í línumannsstöðunni.
Heiðmar, sem hefur leyst Christian Prokop þjálfara af í tveimur síðustu leikjum, er þar með enn þá taplaus í þjálfarastól TSV Hannover-Burgdorf. Hann hefur af og til í gegnum síðustu fimm ár sem hægri hönd Prokop stýrt liðnu í leikjum.
August Pedersen var markahæstur hjá Hannover-Burgdorf með níu mörk. Leif Tissier var næstur með sjö mörk.
Elias Ellefsen á Skipagøtu skoraði sjö mörk fyrir THW Kiel og var markahæstur ásamt Lukas Zerbe.
Hannover-Burgdorf er í 10. sæti deildarinnar með 17 stig eftir 18 leiki. THW Kiel er í fjórða sæti.
Hér fyrir neðan er að finna valda kafla úr leiknum:
