Fyrsti leikur 19 ára landsliðsins í handknattleik karla á Sparkassen Cup í Merzig í Þýskalandi verður í dag gegn landsliði Slóveníu. Flautað verður til leiks klukkan 14. Heimir Ríkarðsson annar þjálfara íslenska landsliðsins hefur svo að segja verið fastagestur með yngri landslið á Sparkassen Cup frá 1995. Á fyrsta mótinu hafnaði íslenska landsliðið í þriðja sæti.
Af þessu tilefni er Heimir í viðtali við síðu mótsins en hann orðinn nánast heiðursborgari í Merzig fyrir að hafa haldið einstakri tryggð við mótið. Í viðtalinu kemur m.a. fram að Guðjón Valur Sigurðsson hafi verið einn þeirra sem var í fyrsta landsliðinu sem Heimir fór með frá Íslandi á mótið fyrir 29 árum.
Fleiri, sem síðar urðu þekktir handknattleiksmenn og einnig þjálfarar, voru í íslenska liðinu á Sparkassen cup fyrir 29 árum. Ísland hafnaði í 3. sæti og vakti árangurinn og ferðin talsverða athygli. Hér fyrir neðan er m.a. umfjöllun í Morgunblaðinu frá 5. janúar 1996.
(beðist er velvirðingar á að föðurnafn Heimis er rangt í megintexta og myndatexta. Heimir er Ríkarðsson, ekki Ríkharðsson. Þá hefur nafn Einars Halldórs Björnssonar liðsstjóra fallið niður. Einar er í lengst til hægri í efri röð við hlið Hjalta).
Sjá einnig: Mikið breytt 19 ára landslið fór til Þýskalands
Nærri 30 árum síðar
Að þessu sinni taka átta lið þátt í mótinu og hefur þeim verið skipt niður í tvo riðla. Auk Íslands og Slóveníu er Holland og B-lið Þýskalands í B-riðli. Þýskaland, A-lið, Sviss, Serbía og úrvalslið frá Saarlandi, einu sambandsríki Þýskalands eru í A-riðli.
Viðureignin við Slóvena er sú eina hjá íslenska liðinu í dag. Á morgun verður leikið gegn B-liði Þýskalands klukkan 10.20 og við hollenska landslðið klukkan 14.20.
Hægt er að kaupa aðgang að streymi frá leikjum á eftirfarandi slóð: https://handball-globe.tv/sparkassencup-merzig .
Að lokinni riðlakeppninni taka tveir leikir við hjá íslenska landsliðinu á sunnudaginn. Það mun ráðast af árangri í leikjunum þremur í riðlakeppninni hver verður andstæðingur í krossspili og um sæti.
