„Mér líður fáranlega vel. Þetta var æðislegur leikur að spila. Þvílík stemning, þvílíkur karakter í liðinu. Þetta var rosalegt,“ sagði kampakátur Óðinn Þór Ríkharðsson í samtali við handbolta.is eftir átta marka sigur Íslands á Svíþjóð í milliriðli 2 í Malmö Arena í Svíþjóð í kvöld.
Óðinn Þór skoraði fimm mörk í sigrinum sem kom Íslandi á topp milliriðilsins.
Stórbrotinn sigur Íslands á Svíþjóð – íslenska liðið komið inn á sporið á ný
Áttu ekki séns á því
Ísland hóf leikinn af miklum krafti og stóð vörnina afskaplega vel.
„Við vorum mjög framsæknir varnarlega. Við vorum að hjálpa fast með höndina, þeir áttu ekki séns á því að halda einhverju floti á boltanum. Þeir eru með tólf mörk í fyrri hálfleik.
Þeir minnka muninn niður í eitt mark í seinni hálfleik og við svörum því. Þeir skoruðu fleiri mörk í seinni hálfleik en leikurinn er bara hraðari. Ef við lítum á þetta í prósentum þá held ég að vörnin sé jafn góð í báðum hálfleikum,“ sagði Óðinn Þór.
Drápu endurkomuna í fæðingu
Sagði hann hafa skipt gríðarlega miklu máli að ná að standa af sér áhlaup Svía í síðari hálfleik og hrósaði Hauki Þrastarsyni fyrir góða innkomu í vörnina.
„Já, það var alveg nauðsynlegt að drepa þessa endurkomu strax og við gerðum það. Viktor var náttúrlega svakalegur, eins og hann er. Menn í vörninni voru sturlaðir. Þetta var ekkert eðlilega flott.
Haukur var svakalegur í vörn í seinni hálfleik. Ég held að ég hafi ekki séð svona varnarframmistöðu áður. Hann var gjörsamlega með annan vænginn í sóknarleiknum þeirra. Það var rosalegt.
Við sækjum ótrúlega mikla orku í fólkið okkar í stúkunni og erum þakklátir fyrir hvern einn og einasta sem mætir á þessa leiki, mætir á þessi mót. Þetta færir okkur mikla orku,“ sagði Óðinn Þór Ríkharðsson að lokum í samtali við handbolta.is.
